കേരള മുഖ്യമന്ത്രിയുടെ ഔദ്യോഗിക വെബ്സൈറ്റ്

പൊഴിയൂർ കടൽഭിത്തി സമയബന്ധിതമായി പൂർത്തിയാക്കുമെന്ന് മുഖ്യമന്ത്രി വി ഡി സതീശൻ. പൊഴിയൂർ കടൽഭിത്തി നിർമാണോദ്ഘാടനം പൊഴിയൂർ സർക്കാർ യു പി സ്‌കൂളിൽ നിർവഹിക്കുകയായിരുന്നു മുഖ്യമന്ത്രി. കടൽക്ഷോഭത്താൽ ദുരന്തം അനുഭവിക്കുന്ന പൊഴിയൂർ നിവാസികളുടെ ഏറെക്കാലത്തെ ജനകീയ ആവശ്യമാണ് സർക്കാർ പരിഹരിക്കുന്നത്. സർക്കാർ അധികാരത്തിലെത്തി 100 ദിവസം തികയും മുമ്പ് ഈ കാര്യത്തിൽ തീരുമാനമെടുത്തു. പദ്ധതികൾ നടപ്പാക്കുക എന്ന ഉറച്ച നിലപാടാണ് സർക്കാരിന്റേത്. കടൽഭിത്തി നിർമാണത്തോടെ ജനങ്ങളുടെ വസ്തുവകകൾക്കും ജീവിതത്തിനും സംരക്ഷണം ഉറപ്പാകും. ഈ നാടുമായി ബന്ധപ്പെട്ട വിവിധ പ്രശ്നങ്ങൾ ശ്രദ്ധയിൽ പെട്ടിട്ടുണ്ട്. അവ ഒന്നൊന്നായി പരിഹരിക്കും. വഴിമുക്ക്- അമരവിള റോഡിന്റെ വികസനം ഉൾപ്പെടെ നടപ്പാക്കും.തീരദേശമേഖലയ്ക്ക് ഏറെ പ്രാധാന്യം നൽകുന്നതായി മുഖ്യമന്ത്രി വ്യക്തമാക്കി. വിഴിഞ്ഞം തുറമുഖം ഉൾപ്പെടെ വികസന പാതയിലാണ്. തുറമുഖങ്ങളുമായി ചേർന്ന് നിരവധി തൊഴിലവസരങ്ങൾ സൃഷ്ടിക്കും. തീരപ്രദേശത്ത് ജീവിക്കുന്ന സാധാരണക്കാർക്ക് കൂടി സംരക്ഷണം ഒരുക്കാൻ പ്രതിജ്ഞാബദ്ധരാണ്. സർക്കാരിന്റെ ആദ്യ ബജറ്റിൽ 25 രൂപയുടെ മണ്ണെണ്ണ സബ്സിഡി 75 രൂപയാക്കി ഉയർത്തി.മത്സ്യത്തൊഴിലാളികളുടെയും തീരപ്രദേശത്തെ ജനങ്ങളുടെയും സങ്കടം മനസ്സിലാക്കിയ സർക്കാരാണ് കേരളത്തിലുള്ളത്. പ്രിയദർശനി പദ്ധതിയിലൂടെ സ്ത്രീകളോടുള്ള ബഹുമാനവും ആദരവും പ്രകടിപ്പിക്കുന്നു. ആശാപ്രവർത്തകർ, അങ്കണവാടി ടീച്ചർമാർ, മറ്റു തൊഴിലാളികൾ തുടങ്ങിയ വിവിധ മേഖലയിൽ പ്രവർത്തിക്കുന്ന എല്ലാവരെയും ശ്രദ്ധിക്കുന്ന സർക്കാരാണ് ഇവിടെ ഉള്ളത്. സാധാരണക്കാർക്കൊപ്പം എന്നും നിലകൊള്ളുമെന്ന് മുഖ്യമന്ത്രി അറിയിച്ചു. പൊഴിയൂർ തീരപ്രദേശത്തെ 3,000 ത്തിലധികം കുടുംബങ്ങളുടെ ആവശ്യമാണ് പരിഹരിക്കപ്പെടുന്നതെന്ന് അധ്യക്ഷ പ്രസംഗത്തിൽ ജലവിഭവ- ഭവനനിർമാണ വകുപ്പ് മന്ത്രി മോൻസ് ജോസഫ് പറഞ്ഞു. ജലവിഭവ വകുപ്പിന് കീഴിലുള്ള പൊതുമേഖല സ്ഥാപനമായ കേരള ഇറിഗേഷൻ ഇൻഫ്രാസ്ട്രക്ച്ചർ ഡവലപ്പ്മെന്റ് കോർപ്പറേഷൻ 93 കോടിരൂപയുടെ പദ്ധതിക്ക് മേൽനോട്ടം വഹിക്കും. ഏകദേശം 1700 മീറ്റർ തീരസംരക്ഷണം ഉറപ്പാക്കും. കടൽഭിത്തിയുടെ മുകളിൽ 4.5 മീറ്റർ വീതിയിൽ നടപ്പാതയും നിർമിക്കും. സർക്കാരിന്റെ 100 ദിന കർമപദ്ധതിയിൽ ഉൾപ്പെടുത്തിയാണ് പദ്ധതിയെന്ന് മന്ത്രി കൂട്ടിച്ചേർത്തു. എൻ ശക്തൻ എംഎൽഎ, ജനപ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുത്തു.

സമൂഹത്തിൽ പ്രയാസമനുഭവിക്കുന്ന പാർശ്വവൽക്കരിക്കപ്പെട്ടവരെയും സങ്കടപ്പെടുന്നവരെയും സ്നേഹത്തോടെ ചേർത്തുനിർത്താൻ വിദ്യാർഥികൾ മുന്നോട്ടുവരണമെന്ന് മുഖ്യമന്ത്രി വി ഡി സതീശൻ.  അവർക്ക് സാമ്പത്തിക സഹായം നൽകാൻ സാധിച്ചില്ലെങ്കിൽപ്പോലും ആശ്വാസമേകുന്ന ഒരു നല്ല വാക്ക് പറയാൻ കഴിയുന്നത് വലിയ കാര്യമാണെന്നും മുഖ്യമന്ത്രി പറഞ്ഞു. കേരള സ്റ്റേറ്റ് ഭാരത് സ്‌കൗട്ട്സ് ആൻഡ് ഗൈഡ്സിന്റെ  2024-2026 കാലയളവിലെ ചീഫ് മിനിസ്റ്റർ ഷീൽഡ് അവാർഡ് വിതരണം നിയമസഭ ശങ്കരനാരായണൻ തമ്പി ഹാളിൽ നിർവഹിക്കുകയായിരുന്നു അദ്ദേഹം.രാജ്യസ്നേഹമുള്ള നല്ലൊരു തലമുറയെ വാർത്തെടുക്കുന്നതിൽ സ്‌കൗട്ട്സ് ആൻഡ് ഗൈഡ്സ് വലിയ പങ്ക് വഹിക്കുന്നുണ്ടെന്ന് മുഖ്യമന്ത്രി ചൂണ്ടിക്കാട്ടി. ഇന്നത്തെ പ്രധാന വെല്ലുവിളിയായ ലഹരിക്കെതിരെ ശക്തമായ പ്രതിരോധം തീർക്കാൻ സമൂഹം ഒന്നിച്ച് നിൽക്കണം. കുട്ടികളെ ലഹരിവലയിലാക്കാൻ ശ്രമിക്കുന്ന മാഫിയകൾക്കെതിരെ ജാഗ്രത പാലിക്കണം.വിദ്യാർഥികൾക്കിടയിൽ ജനാധിപത്യ മൂല്യങ്ങൾ വളർത്തുന്നതിനൊപ്പം പ്രകൃതിയുടെയും മനുഷ്യന്റെയും ആരോഗ്യം ഒന്നാണെന്ന വൺ ഹെൽത്ത് ആശയത്തിന്  പ്രാധാന്യം നൽകണം. സ്വന്തം നേട്ടങ്ങളിൽ അഹങ്കരിക്കാതെ ആത്മവിശ്വാസത്തോടെ ടീമായി പ്രവർത്തിച്ച് നേതൃപാടവം തെളിയിക്കാനും പ്രതിസന്ധികളെ അതിജീവിച്ച് മുന്നേറാനും വിദ്യാർഥികളോട് മുഖ്യമന്ത്രി ആഹ്വാനം ചെയ്തു.ഇന്നത്തെ ക്ലാസ് മുറികളാണ് നാളത്തെ നാടിന്റെ ഭാവിയും നേതൃത്വവുമെന്ന് ചടങ്ങിൽ അധ്യക്ഷനായ  പൊതുവിദ്യാഭ്യാസ വകുപ്പ് മന്ത്രി എൻ. ഷംസുദ്ദീൻ പറഞ്ഞു. കേവലം പാഠങ്ങൾ പഠിച്ച് പരീക്ഷ എഴുതി മാർക്ക് വാങ്ങുന്നത് മാത്രമല്ല വിദ്യാർഥി ജീവിതം. ജീവിതത്തെ കൂടുതൽ മനസ്സിലാക്കാനും വ്യക്തിത്വത്തിന്റെ അടിത്തറ ശക്തിപ്പെടുത്താനും പാഠ്യേതര പ്രവർത്തനങ്ങൾ അത്യാവശ്യമാണ്. സമൂഹത്തിന് വേണ്ടി തങ്ങളാൽ കഴിയുന്നത് ചെയ്യണമെന്ന ബോധ്യം വിദ്യാർഥികളിൽ നട്ടുവളർത്താൻ സ്‌കൗട്ട്സ് ആൻഡ് ഗൈഡ്സിലെ പ്രവർത്തനങ്ങളിലൂടെ സാധിക്കുമെന്നും ഈ അച്ചടക്കവും അനുഭവങ്ങളും ജീവിതത്തിലുടനീളം വ്യക്തിത്വത്തിന് തിളക്കം നൽകുമെന്നും മന്ത്രി വ്യക്തമാക്കി.പരിപാടിയിൽ പൊതുവിദ്യാഭ്യാസ വകുപ്പ് ഡയറക്ടർ  അരുൺ കെ വിജയൻ, കേരള സ്റ്റേറ്റ് ഭാരത് സ്‌കൗട്ട്സ് ആൻഡ് ഗൈഡ്സ് സ്റ്റേറ്റ് സെക്രട്ടറി ഡോ.  അബ്ദുറഹൂഫ് വി, കരിയർ ഗൈഡൻസ്  ആൻഡ് അഡോളസെന്റ് കൗൺസലിങ്  സെൽ സ്റ്റേറ്റ് കോർഡിനേറ്റർ ഡോ. അസീം, വാർഡ് മെമ്പർ കെ ആർ ക്ലീറ്റസ് തുടങ്ങിയവർ സംബന്ധിച്ചു.

ഗുരുദേവ ദർശനം ഉൾക്കൊണ്ടു കൊണ്ടുള്ള ഭരണമാകും ഈ സർക്കാർ കാഴ്ച വെയ്ക്കുകയെന്ന് മുഖ്യമന്ത്രി വി ഡി സതീശൻ. വർക്കല ശിവഗിരിയിൽ 99ാമത് ശ്രീ നാരായണ ഗുരു സമാധി ദിനാചരണത്തിന്റെയും ഒരു വർഷം നീണ്ടു നിൽക്കുന്ന സമാധി ശതാബ്ദി ആചരണത്തിന്റെയും ഉദ്ഘാടനം നിർവഹിക്കുകയായിരുന്നു അദ്ദേഹം. ശ്രീ നാരായണ ഗുരുവിന്റെ മഹാസമാധി മന്ദിരത്തിലെത്തി മുഖ്യമന്ത്രി പുഷ്പാർച്ചന നടത്തി.ജാതിമത ചിന്തകളിൽ നിന്നും പിന്തിരിപ്പൻ ആശയങ്ങളിൽ നിന്നും കേരളത്തെ മാറ്റി നിർത്താനുള്ള ശ്രീ നാരായണ ഗുരുവിന്റെ പോരാട്ടം ഈ സർക്കാർ തുടരും. ഒരു ജാതി, ഒരു മതം, ഒരു ദൈവം എന്ന ഗുരുദേവ ചിന്ത കേരളത്തിന്റെയാകെ മതമായി മാറിയതാണ്. കേരളത്തിന്റെ മതേതര മനസ്സിന് വിത്ത് പാകിയത് ശ്രീ നാരായണ ഗുരുവാണ്. നവോത്ഥാനത്തിന്റെ വെളിച്ചത്തിലേക്ക് കൈപിടിച്ച് നടത്തി, കേരളത്തെ മുന്നോട്ട് നയിച്ചത് ഗുരുവാണെന്ന് വിശ്വസിക്കുന്ന ശ്രീ നാരായണീയനാണ് താനെന്നും മുഖ്യമന്ത്രി പറഞ്ഞു. ഗുരുദർശനം നമ്മുടെ പൈതൃകമാണെന്നും നമ്മൾ അതിന്റെ പിന്തുടർച്ചാവകാശികളാണെന്നും എല്ലാ മലയാളികളും തിരിച്ചറിയണമെന്നും അദ്ദേഹം ആവശ്യപ്പെട്ടു.ജീവിതം ഒരേ സമയം സമരോത്സുകവും ആധ്യാത്മികവും ആക്കിയ വ്യക്തിത്വമാണ് ശ്രീ നാരായണ ഗുരുവിന്റേതെന്ന് കൃഷി വകുപ്പ് മന്ത്രി ടി സിദ്ദിഖ് പറഞ്ഞു. ഇന്നത്തെ കേരളത്തിന്റെ മാനവീയകതയ്ക്ക് അടിത്തറ പാകിയത് ഗുരുവാണെന്നും അദ്ദേഹം അനുസ്മരിച്ചു.സമാധി ദിനാചാരണത്തോട് അനുബന്ധിച്ചുള്ള സമ്മേളനത്തിൽ ശ്രീ നാരായണ ധർമസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ അധ്യക്ഷത വഹിച്ചു. ജനറൽ സെക്രട്ടറി സ്വാമി ശുഭംഗാനന്ദ സ്വാഗതം ആശംസിച്ചു. സ്വാമി സൂക്ഷ്മാനന്ദ അനുഗ്രഹ പ്രഭാഷണം നടത്തി. സ്വാമി ശാരദാനന്ദ, സ്വാമി നവ്യാനന്ദ, എം എൽ എ മാരായ വി ജോയ്, വിദ്യ ബാലകൃഷ്ണൻ, വർക്കല നഗരസഭ അധ്യക്ഷ ഗീത ഹേമചന്ദ്രൻ എന്നിവർ സന്നിഹിതരായിരുന്നു.